Над Тракелямі ліліся песні гарманістаў (Обновлено)
Творчая знаходка Года культуры — цыкл масавых мерапрыемстваў у аграгарадках Воранаўшчыны, якія замацоўваюцца як брэндавыя. Прайшлі і запомніліся вяскоўцам святы: бліноў у Пераганцах, Юзафа — у Беняконях, мнагадзетных сем’яў — у Паляцкішках, дзіцячай творчасці — у Гірках. У мінулую нядзелю фэст завітаў і ў Тракелі.
Святочнае мерапрыемства “Іграй, гармонік!” сабрала жыхароў аграгарадка і гарманістаў з розных куткоў раёна, якія ў прысутнасці шматлікіх гледачоў змагаліся за званне лепшага. Браніслаў Чапля (аг. Канвелішкі), Віктар Казлоўскі (аг. Жырмуны), Дзяніс Мацук з (аг. Тракелі), Анжаліка Андрушкевіч (в. Бастуны), Юрый Стралінскі (Воранава), Андрэй Мікша і Анастасія Козел (аг.Пагародна). Сярод сямі канкурсантаў былі і дзяўчаты. Спрытна і элегантна яны ўпраўляліся з важкім інструментам. Музыкантам трэба было выканаць традыцыйную музычную кампазіцыю, павесяліць гасцей прыпеўкамі, сыграць творы сучасных аўтараў. Гучнымі апладысментамі дзякавалі канкурсантам за душэўную ігру вяскоўцы, асабліва шчодра адорвалі імі свайго земляка-гарманіста. Аднак самую няпростую задачу — вызначыць пераможцаў — павінна было вырашыць журы пад старшынствам Таццяны Цехановіч, начальніка аддзела ідэалагічнай работы, культуры і па справах моладзі райвыканкама. Бясспрэчна, самым артыстычным прызналі Браніслава Чаплю, музыкантам-віртуозам — Дзяніса Мацука. Трэцяе месца заняў Віктар Казлоўскі, другое — Анастасія Козел. Перамог у раённым конкурсе гармаістаў Юрый Стралінскі.
На гэтым свята не закончылася. Яго прадоўжыла канцэртная праграма выканаўцаў і калектываў эстраднай творчасці клубных устаноў раёна, працавалі дзіцячыя атракцыёны, гандаль. Свае вырабы прывезлі мясцовыя майстры і нават гандляры з Міру. Яны прапаноўвалі ўрыгожыць дзіцячыя тварыкі малюнкам у тэхніцы аквагрыму, пакатацца на кані і восліку.
Арганізатары мерапрыемства выказалі надзею, што свята гарманістаў прыжывецца ў Тракелях і штогод у другую нядзелю чэрвеня будзе збіраць тут артыстаў і мясцовых жыхароў. А ў канцы месяца брэндавае свята завітае ў Жырмуны.
Вольга ВАРАБ’ЁВА.
Фота аўтара.
