"Я родам з Адраджэння". Фестываль кнігі адбыўся на Лідчыне
Кніжныя выставы, песні, танцы і многае іншае, і ўсё гэта – проста на вуліцы, пад адкрытым небам, на вачах у дзясяткаў мінакоў… Да 500-годдзя беларускага кнігадрукавання і да Дня бібліятэк быў прымеркаваны фестываль кнігі “Зоркі лідскіх небасхілаў”, які адбыўся ў мінулую пятніцу каля помніка Францыску Скарыну. Зразумела, што арганізатарам гэтага свята кнігі выступіла Лідская раённая бібліятэка імя Янкі Купалы – галоўны лідскі дом кніг.
Яшчэ перад пачаткам мерапрыемства ля помніка беларускаму першадрукару гучала сярэдневяковая музыка ў выкананні гурта “Скудрынка” – музыканты як бы заклікалі мінакоў не праходзіць міма, спыніцца, папрысутнічаць на свяце, пранікнуцца духам даўніны. А яшчэ – ушанаваць памяць беларускага асветніка, які пяць стагоддзяў назад выданнем друкаваных кніг Бібліі паспрыяў увядзенню Беларусі ў “сям’ю” перадавых еўрапейскіх краін.
Нягледзячы на хмарнае, ветранае надвор’е, людзей на фестываль пад адкрытым небам сабралася шмат. Прыемна адзначыць, што вялікую частку прысутных складалі школьнікі, навучэнцы, – значыць, памяць аб Скарыне і яго справе жыве і ў малодшых пакаленнях сучаснікаў.
Са святам прысутных, у першую чаргу работнікаў бібліятэк і тых, хто мае дачыненне да друкарскай і выдавецкай справы, павіншаваў намеснік старшыні Лідскага райвыканкама Віктар Пранюк. Гаворачы аб Францыску Скарыне, Віктар Францавіч адзначыў, што на працягу стагоддзяў асоба першадрукара з’яўляецца пуцяводнай зоркай для беларусаў, у тым ліку для лідчан, а заклік, высечаны на помніку Скарыну ў Лідзе, – “Бярыце і чытайце” – важны для маладога пакалення лідчан.
Аб вялікім выхаваўчым значэнні Бібліі і ўвогуле кніг гаварылі прадстаўнікі праваслаўнага і каталіцкага духавенства – сакратар Лідскай епархіі протаіерэй Максім Цыгель і ксёндз Фарнага касцёла Узвіжання Святога Крыжа Віталій Сідорка. З гісторыяй друкарскай справы на Лідчыне і з днём сённяшнім мясцовага кнігадрукавання азнаёміў прысутных дырэктар Лідскай друкарні Мікалай Пякарскі. У ролі Францыска Скарыны выступіў мастак-пастаноўшчык і акцёр народнага драматычнага тэатра Палаца культуры горада Ліды Алег Лазоўскі.
Былі ў праграме фестывалю выступленне мясцовых рыцараў, сярэдневяковы танец, патрыятычныя песні (апошнія – у выкананні салістаў Лідскага эстраднага аркестра). Верш пра беларускую мову зачытала перад публікай лідская паэтэса Ганна Рэлікоўская.
Госці мерапрыемства мелі магчымасць азнаёміцца з імправізаванымі выставамі кніг і іншай друкаванай прадукцыі, прыняць удзел у майстар-класе па пісьме пер’евай ручкай (у апошнім асабліва актыўна ўдзельнічалі дзеці; свой аўтограф забытай пер’евай ручкай пакінуў і галоўны герой урачыстасці – Францыск Скарына, ролю якога, як ужо адзначалася, бліскуча сыграў Алег Лазоўскі).
ВАРТА ПАЧЫТАЦЬ:
