Маленькiя таленты “Рыфмаванкi”
Ці магчыма выгадаваць будучага паэта? Такім пытаннем задалася настаўніца пачатковых класаў Пагародзенскай сярэдняй школы Алена Сцяфанаўна Ластоўская.
Доўга прыглядалася да сваіх выхаванцаў, шукаючы ў іх творчы патэнцыял. Ды і сама паступова папаўняла свае веды пра вершаскладанне. І ўрэшце, калі тры гады назад у яе першы клас прыйшлі васямнаццаць творчых, дапытлівых, цікаўных, з нестандартным мысленнем дзяцей, вырашыла, што з цягам часу створыць літаратурнае аб’яднанне. Вучням давала творчыя заданні. Напрыклад, прапаноўвала два словы, з якіх неабходна было скласці два рыфмаваныя радкі. У пачатку бягучага навучальнага года адкрыла аб’яднанне “Рыфмаванка”, куды запрасіла самых адораных трэцякласнікаў. У яго ўвайші Яна і Ульяна Шалкоўскія, Анастасія Будрэвіч, Мікалай Сянюта, Арсеній Паберайла і Лізавета Казілава, якія праяўлялі сябе найбольш яскрава на ўроках беларускай літаратуры.
— Дзеці пішуць вершы на беларускай мове. Яе мы абралі не выпадкова. Хацелася, каб у нашых дзяцей цікавасць і любоў да роднай мовы мацнела, — расказвае кіраўнік літаратурнага аб’яднання. — Калі ж, бывае, не можам падабраць трапнага слова, на дапамогу прыходзіць настаўніца беларускай мовы і літаратуры Валянціна Валер’еўна Гень. Я люблю прыроду, гэта і перадала сваім выхаванцам. Таму ў іх творах яна дамінуе. Перад тым, як напісаць верш пра тую ж птушку, спачатку звяртаемся да энцыклапедыі, вывучаем яе звычкі, выгляд. Таму, напэўна, атрымоўваецца добра ў дзяцей свае адчуванні выказаць у вершаваных радках. Прызнацца, мяне іншы раз здзіўляе іх непасрэднасць і ўменне бачыць у звычайным незвычайнае. Можам пахваліцца выданнем тэматычнай брашуры “Пра зіму”. А ці вырастуць пад маім крылом будучыя паэты — пакажа час.
Гэтага і пажадаем Алене Сцяфанаўне і яе таленавітым вучням.
Марына КАНДРАТОВІЧ.
На здымку: на занятках літаратурнага аб’яднання “Рыфмаванка”.
Фота Алега БЕЛЬСКАГА.
