У ноч на Купалле хлопцы і дзяўчаты гулялі — папараць-кветку шукалі (фота)
У Воранаве з 8 на 9 ліпеня адзначылі адно з самых старадаўніх і рамантычных народных святаў — Купалле. Вечар на пачатку гуляння быў на дзіва ціхі і цёплы. Вада ў возеры бы застыла на месцы, нават лістота не варушылася на дрэвах. У паветры плыў водар сена і шашлыкоў, наваколле поўнілася купальскімі мелодыямі. Людзей на беразе возера сабралася нямала. Дарослых і малых гараджан вабілі да сябе шматлікія палаткі з рознымі кандыдарскімі і кулінарнымі прысмакамі, быў для дзетвары і вялікі выбар цацак…
Атмасферу весялосці не змог парушыць нават нечакана наляцеўшы вецер, які прынёс з сабой і не вельмі прыемны дробны дождж. Ды адпачываючых менш не стала. Яны, схаваўшыся пад парасонамі, сталі не толькі гледачамі, але і ўдзельнікамі тэатралізаванага прадстаўлення “Купальская казка”. У ролях Чырвонай Шапачкі, яе Маці, Каралевы, Шэрага Ваўка таленавіта паказалі сябе супрацоўнікі гарадского цэнтра культуры і вольнага часу. Гэта быў не проста спектакль, а сапраўдны мюзікл на сучасныя тэмы, які ўвабраў у сябе яркае акцёрскае майстэрства, вакальныя і харэаграфічныя здольнасці усіх выканаўцаў. Павесяліў публіку і гульнёвы блок прадстаўлення.
А з паяўленнем Купалы і Купалінкі свята набыло шчэ больш рамантычную атмасферу: дзяўчаты пусцілі на ваду вянкі, загарэлася купальскае вогнішча, вакол якога сабраўся вялікі купальскі карагод… І было гулянне аж да самага рання.
