Свята бліноў у нядзелю адбылося ў аграгарадку Пераганцы (фота)
Гэта брэндавае мерапрыемства, заяўленае яшчэ ў мінулым годзе аддзелам ідэалагічнай работы, культуры і па справах моладзі, распачало чараду свят, якія характэрны для пэўнай мясцовасці.
Блінны фэст крыху парушыў звыклы рытм жыцця жыхароў аграгарадка: столькі гасцей-артыстаў, музыка на ўсе вуліцы. Свята прысвячалася блінам, таму не дзіўна, што асноўным гледачом на ім была жаночая палавіна аграгарадка, хаця і многія мужчыны не прамінулі зазірнуць на адкрытую пляцоўку каля сельскага Савета, дзе яно праходзіла. Яго ўдзельнікі пачулі ад вядучай шмат цікавай і пазнавальнай інфармацыі з гісторыі паходжання гэтай стравы, падзяліліся сакрэтамі і рэцэптамі яе прыгатавання, мелі магчымасць прадэманстраваць уласную выпечку, якую спярша, чым вынесці вердыкт пра самую смачную, дэгуставалі члены журы і прысутныя на свяце.
Круглыя, румяныя, з полымя з жару, з самымі рознымі начынкамі, бліны так і прасіліся ў рот. Не пачаставацца смачнай стравай было немагчыма, як і складана было прайсці каля духмянай юшкі. Пасля, добра падмацаваўшыся, можна было і пагуляць.
Галіна ШЛЕМПА.
Фота Алега БЕЛЬСКАГА.
