Са святам вас, хлебаробы «ГМК-Агра»!
На ніву сельгаспрадпрыемства “ГМК-Агра” прыйшло добрае свята “Дажынкі”. Як і належыць беларусам, пасля заканчэння годнай хлебаробскай справы аграрыі сабраліся адзінай сям’ёй, каб падвесці вынікі руплівай працы і ўзнагародзіць лепшых хлебаробаў.
Сёлета палеткі гаспадаркі ўрадзілі няблага. Каравай аграрыі атрымалі практычна ў 11 тысяч тон, ураджайнасць — 48,1 цэнтнера з гектара, зазначыў першы намеснік старшыні райвыканкама Аляксандр Ясінскі:
— Гэта добры вынік, аднак, упэўнены, вы можаце яго памножыць. Для гэтага ёсць усё: і рэсурсы, і кадры, і моцнае плячо падтрымкі — ААТ “Гродзенскі мясакамбінат”. Памнажайце свае здабыткі, і няхай з кожным годам цяжэе ваш каравай.
Трэба сказаць, што земляробы “ГМК-Агра” і вытворцы мясакамбіната даўно сталі адзінай камандай. Як тут гараджанам не раздзяліць радасць “Дажынак” з вяскоўцамі!? Падводзячы рысу працы, дырэктар гродзенскага камбіната Вольга Янушка падкрэсліла, што ад зладжанай і эфектыўнай дзейнасці сельгасарганізацыі залежыць далейшая паспяховая работа перапрацоўчага прадпрыемства. Калі і надалей будуць працаваць на сумесны вынік, усё будзе па плячы і ўсе задумкі здзейсняцца.
— Жатва не была лёгкай: дзесьці не спрыяла надвор’е, а дзесьці падводзіла тэхніка, — была шчырай у слове ў адказ дырэктар УП “ГМК-Агра” Ганна Бандалевіч. — Аднак усе працавалі дружна, як адзін лакаматыў і выйшлі з уборачнай кампаніі годна. Дзякуй за бяссонныя ночы, хворыя спіны, а вашым сем’ям — за падтрымку і разуменне таго, што хлеб патрабуе і часу, і намаганняў.
Галоўным героям жніва падрыхтавалі грашовыя прэміі, кветкі і падарункі. Дыпломы райсельгасхарча і райкама прафсаюза работнікаў АПК атрымалі камбайнер і вадзіцель, запісаўшыя на свой лік па дзве тысячы тонн зерня, Іван Юралайць і Алег Ісачанка, іх жа чакалі ўзнагароды ад ААТ “Гродзенскі мясакамбінат”. Падзяка райсельгасхарча і райкама прафсаюза работнікаў АПК аб’яўлена механізатарам Андрэю Казлоўскаму і Раману Пілецкаму. Адзін за адным выходзілі на сцэну камбайнеры, вадзіцелі, трактарысты-машыністы, аператары зернесушыльных установак і іх памочнікі — каля сарака працаўнікоў узнагародзіла кіраўніцтва гаспадаркі.
З асаблівай цеплынёй аграрыі прымалі ў дар хлеб як сімвал дабрабыту, урадлівасці і долі. Канешне ж, свята ўвянчалі песня і танцы — падарункі ад культработнікаў Воранаўшчыны і радунскай дзятвы. Гэта даўняя завядзёнка ў беларусаў: папрацаваць да сёмага поту, а пасля хораша адпачыць пад гучны гармонік.
Марына КАНДРАТОВІЧ.
Фота аўтара.
