Натхнёныя класiкаў радкамi
У мінулую пятніцу ў Канвелішскім навучальна-педагагічным комплексе вязку з вершаў Якуба Коласа і Янкі Купалы аматарам паэтычнага слова падаравалі школьнікі Воранаўшчыны. Узнёсла і кранальна гучалі песні, пакладзеныя на словы творцаў, у выкананні вучняў НПК і настаўніка Валерыя Зянонавіча Адамчыка.
У сямнаццаты раз творчых і таленавітых хлапцоў і дзяўчат вітаў конкурс чытачоў “Рух душы”, прысвечаны 135-годдзю з дня нараджэння двух волатаў беларускай літаратуры. Многія з вучняў ужо паспелі заявіць аб сабе як аб выдатных дэкламатарах. Аднак у гэты дзень хваляваліся ўсе: і хто дагэтуль неаднаразова выходзіў на сцэну, і хто ўпершыню выпрабоўваў свае дэкламатарскія здольнасці. Бо выступаць даводзілася перад гасцямі-літаратарамі, членамі Саюза пісьменнікаў Беларусі — намеснікам старшыні абласнога аддзялення пісьменніцкай арганізацыі Дзмітрыем Радзівончыкам, кандыдатамі філалагічных навук, дацэнтамі кафедры беларускай літаратуры Гродзенскага дзяржаўнага ўніверсітэта імя Я. Купалы Алінай Эдмундаўнай Сабуць і Русланам Канстанцінавічам Казлоўскім.
Справіўшыся з эмоцыямі, канкурсанты выразна, пранікнёна і ад душы чыталі коласаўскія і купалаўскія творы. Нібы на яве, слухачы ўяўлялі, як гаманіла-спявала Сымонава скрыпка, дзядзька Антось гатаваў клёцкі з бярозавым сокам, цешча да зяця ў госці хадзіла, паляцела да сонца Алеся… У вачах прысутных ззялі іскрынкі смеху, калі гучалі байкі Якуба Коласа. Лёгкі ж сум навявалі радкі пра восень… Лепш за ўсіх данесці гледачам аўтарскую пазіцыю, перадаць сэнс, укладзены ў вершы класікамі літаратуры, удалося Юстыне Огар, Данілу Трахімчыку і Анастасіі Барэйшы з Канвелішскага НПК, Валерыі Тжэцяк, Аляксандру Струкялю і Андрэю Запасніку з Нацкага, Наталлі Ваганавай і Эвеліне Лялько з Воранаўскай школы, Леаніду Ненартовічу і Мікалаю Сянюце з Пагародзенскай, Івану Новіку і Даніілу Талайкоўскаму з Радунскай, Віялеце Русялевіч з Доцішскай і Віялеце Шчарбачэні з Беняконскай школы.
Выступоўцы парадавалі журы не толькі цудоўным дэкламаваннем вершаў, але і ўласнымі творамі, прысвечанымі пісьменнікам-юбілярам. У кожнага пачынаючага паэта — свае адметныя Купала і Колас. Адчувалася, што разам з імі юныя чытачы ідуць па жыцці і ў іх творах чэрпаюць сваё натхненне. “Проба пяра” стала ўдалай для Анжалікі Бараноўскай, Аляксандра Савуля і Паліны Станкевіч з Канвелішкаў, Дзіяны Дудо і Аляксандры Крысянель з Доцішскаў, Ангеліны Жэгждрынь і Аляксандра Івашкевіча з Радуні, а таксама Ульяны Роўбуць з Тракеляў. А падарункі ад Саюза пісьменнікаў Беларусі, падрыхтаваныя Дз.М. Радзівончыкам, атрымалі Анжаліка, Аляксандра і Ангеліна.
Да шэрагу віншаванняў далучылася і рэдакцыя “Воранаўскай газеты”. Па выніках аб’яўленага ёю сёлетам конкурсу “Мой першы верш”, што быў прысвечаны 500-годдзю беларускага кнігадрукавання, былі ўручаны сувеніры Юстыне Огар за першае месца, Лінасу Мацюлевічу з Пелясы — за другое і Даніілу Савелю з Доцішкаў — за трэцяе.
Марына КАНДРАТОВІЧ.
Фота аўтара.
