Як у Гірках гулялі ды бульбу праслаўлялі! (Фота, відэа, дапоўнена)
Зарад бадзёрасці і добрага настрою шчодра раздавалі ў Гірках, у “Гасцёўні бульбаша”.
[embed]
Пад такой назвай у нядзелю ў аграгарадку ладзілася свята ў гонар другога хлеба беларусаў. Самы час напрыканцы кастрычніка парадавацца сабранаму ўраджаю. Дый сельскагаспадарчы год завяршаецца, руплівыя вяскоўцы маюць час адпачыць. Чаму б не сустрэцца на свяце і не павесяліцца ў “Гасцёўні бульбаша”, якая з самага ранку рыхтавалася прыняць гасцей. Будавалася сцэна, з’язджаліся гандляры і артысты, на вачах рос гульнёвы надзіманы горад.
Папярэднічаў адкрыццю свята абход вуліц аграгарадка, бо загадзя Гіркаўскім цэнтрам культуры быў аб’яўлены кулінарны конкурс на лепшы стол з бульбяных страў. Мясцовыя гаспадыні-ўдзельніцы сустракалі на падворках конкурсную камісію, якая бадзёра рухалася ў суправаджэнні гарманіста. Пачалі з Цэнтральнай вуліцы, збочылі на Лясную, потым — на Садовую. На сталах, сервіраваных у беларускіх традыцыях, красаваліся і спакусліва пахлі клёцкі, дранікі, бабка, бліны, бульбяныя “лапцікі”, “вожыкі” і нават “ружы”! Камісію чакала нялёгкая задача — пасля дэгустацый вызначыць пераможцу. І яны вырашылі справу па-сяброўску — не сталі выдзяляць нікога. Бо ўсе стравы, прыгатаваныя ўмелымі рукамі вопытных і маладых гаспадынь, былі вельмі смачнымі. За старанне ўзнагародзілі ўсіх удзельніц.
На ўрачыстым адкрыцці свята бульбай-соллю сустракалі ганаровых гасцей — загадчыка сектара культуры райвыканкама Таццяну Цехановіч, старшыню Гіркаўскага сельсавета Святлану Мушынскую, старшыню прафкама КСУП “Гіркі” Дануту Лунь. А добрым прывітальным словам — усіх прысутных. Пазней на галоўнай пляцоўцы “Гасцёўні” выбіралі найлепшую Бульбачыху, якая ўмее і смачна прыгатаваць, і складна праспяваць, і прыгожа сказаць. За тытул спрачаліся шэсць жанчын з клубных устаноў раёна — Радунскай, Доцішскай, Нацкай, Жырмунскай, Пагародзенскай, Больцішскай. Канкурсанткі здзіўлялі бульбянымі шэдэўрамі (чаго варты бульбяна-чыпсавы “капялюш”, “гнёзды” і загадкавы “баец з гарачымі бакамі”!), забаўлялі гледачоў прыпеўкамі. Журы назвала пераможцай Ганну Нядзельку, загадчыцу Больцішскага цэнтра культуры і вольнага часу.
Многія вяскоўцы атрымалі падарункі за ўдзел у віктарыне, а вучні Клайшанскай школы — за вырабы з бульбы. За першае месца ўзнагароджаны першакласнікі, за другое Арсеній Паўловіч, за трэцяе — васьмікласнікі.
Аж да вечара каля “Гасцёўні бульбаша” гучала музыка. Выканаўцы і калектывы народнай творчасці нашага раёна, затым Шчучынскага змянялі адзін аднаго на сцэне, падтрымліваючы агульны вясёлы настрой. Кіраўніцтва КСУП “Гіркі” зрабіла сваім працавітым землякам падарунак — запрасіла сталічны ансамбль “Гуляй, бульбаш”. Яго выступленне яшчэ больш падбадзёрыла людзей, ногі самі пайшлі ў скокі!
Вольга ВАРАБ’ЕВА.
Фота аўтара.
