Са сваім караваем і дажыначным снапом — у Зэльву

  Духмяныя, з любоўю выпечаныя з сёлетняга ўраджаю караваі і важкія, змайстраваныя са збажыны роднай зямлі снапы несумненна сталі ўпрыгожваннем фэсту працаўнікоў вёскі. На славу пастараліся і хлебапёкі з работнікамі культуры і аграрыямі, годныя вырабы прадставілі на свяце. Несумненна, цеплыню сваіх сэрцаў уклалі ў каравай работнікі пякарні Воранаўскага філіяла аблспажыўтаварыства . Вось і атрымаўся ён у іх на заглядзенне! Ні больш ні менш, а пятнаццаць кілаграмаў вагі і амаль метр у вышыню. Чатыры яго паверхі ўпрыгожылі кветкамі і каласкамі з цеста.

‌Годна выглядае і воранаўскі дажыначны сноп-млын. Ён "вырас" да двух метраў, а ў яго "сэрцы" замацаваны герб Воранава. Старанна сплялі яго з каласоў жыта, пшаніцы ды аўса з ніў нашай малой радзімы творчыя працаўніцы аддзела рамёстваў з працалюбівымі хлебаробамі гаспадаркі "Эліт-Агра Больцінікі". Па ім "рассыпалі" далікатныя саламяныя кветкі як сімвал ураджаю і ўрадлівасці.