З малітвай за родны край і сем’і — у Тракелі

Толькі на падмурку адзінства можна будаваць будучыню. Гэтая слушная думка стала лейтматывам у другі дзень фэсту. А адзінства, як вядома, пачынаецца з сям’і. Менавіта таму штогод ля абраза Божай Маці аднаўляюць шлюбныя абяцанні. 

Суджанцы ўзгадваюць словы, якія кіравалі адзін аднаму перад алтаром, духоўна ўбагачаюцца, чэрпаюць сілы перад цудадзейным абразам на далейшае сумеснае жыццё. Некалькі год запар прымаюць удзел у гэтым абрадзе Генадзь і Алена Чарнавус з Радуні.

— Мы зноў прыехалі сюды падзякаваць Маці Божай за дар паклікання, у першую чаргу, суджанства і, канешне ж, бацькоўства. Гэтае месца стала для нас сапраўды мілым кутком, пэўна, такім, аб якім пісаў Якуб Колас. Мы не прапусцілі ніводнай пілігрымкі, я нават цяжарная ішла да нашай нябеснай заступніцы. І нашу дачушку назвалі з мужам у гонар Маці Божай — Марыя, — шчырая і шчаслівая ўсмешка не сыходзіла з твару Алены. — Чаму аднаўляем шлюбныя абяцанні? Пасля абраду мы адчуваем моц, Божае бласлаўленне, падтрымку Марыі. Абавязкова дзякуем за кожны пражыты год (сёлета ў жніўні суджанцы Чарнавус адзначаць 13-ю гадавіну сумеснага жыцця. — Прыкм. аўт.), за тое, што з намі адбывалася. Абавязкова просім блаславіць на будучае, каб жылі толькі з Богам і не сыходзілі з Яго дарогі.

Кульмінацыяй фэсту стала святая імша, якую ўзначаліў Апостальскі нунцый Антэ Ёзіч. Прынялі ў ёй удзел прадстаўнікі мясцовай улады на чале са старшынёй райвыканкама Дзмітрыем Захарчуком, апостальскі візітатар для беларускіх грэка-католікаў архімандрыт Сяргей Гаек, біскупы Беларусі і інш. 

—Дзякуючы Маці Божай тракельская святыня становіцца прывабнай для вернікаў, — звярнуўся ў пропаведзі да прысутных Антэ Ёзіч. — Тут яны знаходзяць супакой, надзею, падтрымку пры малітве аб выздараўленні ад розных захворванняў, у тым ліку каранавірусу. Кожны з вас, мяркую, знойдзе сілы, каб да Маці Божай прынесці свае сэрцы, шчыра прасіць яе абараніць ад розных нязгод.

Цудадзейны абраз Каралевы сем’яў аздобілі лілеямі прадстаўнікі раённай улады.

— Няхай веліч і значнасць свята адчувае кожны з прысутных і праз стагоддзі гучыць у Тракелях малітва за нашу  краіну і яе народ, за нашу малую радзіму — Воранаўшчыну, — пажадаў землякам Дзмітрый Захарчук.

Натхнёныя адзінай малітвай, вернікі не спяшаліся пакідаць гасцінныя Тракелі. Па запрашэнні настаяцеля касцёла Юрыя Бяганскага яны прагуляліся па наберажных шасці азёр, палюбаваліся маляўнічымі краявідамі добраўпарадкаванай тэрыторыі.

Мерапрыемствы ў тракельскім касцёле на гэтым не спыняцца. Тут чакаюць ўдзельнікаў велапелігрымак 17 ліпеня з Іўеўскага дэканата, 24 ліпеня — аматараў рыбнай лоўні на конкурсную праграму, а 25 ліпеня, у дзень святога Крыштофа — апекуна вадзіцеляў, — на рэтрафестываль тэхнікі, у якім плануецца ўдзел байкераў і ўладальнікаў рэтрааўтамабіляў.

Марына КАНДРАТОВІЧ.

Фота аўтара і Сяргея ГРЫЧЫКА.