Да Маці Божай Тракельскай — з паклонам

У аграгарадку Тракелі адбылася штогадовая ўрачыстасць, прысвечаная Маці Божай. Сёлета яна прайшла пад дэвізам: “Марыя — ты наша надзея”.

Два дні пляц ля касцёла Адведзінаў Найсвяцейшай Панны Марыі ў Тракелях прымаў паломнікаў. Фэст у гонар нашай нябеснай заступніцы зноў сабраў каталіцкіх вернікаў з розных куткоў Беларусі. Кожны паспяшыў у санктуарый, каб перад цудадзейным абразам выказаць свае надзеі, падзякаваць за плёны працы ці вучобы і ў цішы сэрца аддаць ў апеку Марыі сябе і сваіх родных. З’яднаныя малітвай, вернікі прасілі ў Каралевы Беларусі за сваю краіну, за землякоў, каб любоў, згода і мір ніколі не пакідалі нашы дамы і сем’і.

Падчас урачыстасцяў у санктуарыі Маці Божай Каралевы нашых сем’яў у Тракелях адбылася і прэзентацыя кнігі Станіслава Янчарскага “Касцёлы Беларусі. Гродзенская дыяцэзія”. У двухтомным выданні, прысвечаным 30-годдзю адраджэння структур Каталіцкага Касцёла ў Беларусі, змешчаны фотаздымкі з гісторыяй усіх святыняў Прынямоння.

Сімвалічным стала адкрыццё Марыйнай алеі. На ёй размясціліся 15 копій унікальных абразоў Маці Божай з розных мясцін гарадзенскага краю. 

Вечарам у адзінае зліліся ўсе малітоўныя пасылы — са свечкамі ў руках вернікі прайшліся па аграгарадку. “Няхай шчасціць людзям, якія жывуць у гэтым святым месцы, няхай у іх родзіць збожжа, на стале заўжды будзе ўдосталь хлеба!” — шапталі з даверам, адрасуючы гэтыя словы Марыі.

Святой імшой, якую цэлебраваў новаабраны старшыня Канферэнцыі біскупаў Беларусі Алег Будкевіч, завяршыўся першы дзень фэсту. Узяўшы слова, біскуп Гродзенскай дыяцэзіі Аляксандр Кашкевіч заклікаў вернікаў маліцца за памерлых продкаў, прасіць у святога Юзафа, год якога аб’яўлены ў каталіцкім касцёле, каб узяў у апеку беларускія сем’і. Падчас сёлетніх адпустовых урачыстасцяў, падкрэсліў біскуп, мы дзякуем Богу за 30 гадоў існавання Гродзенскай дыяцэзіі.