З вераю і малітваю — да Марыі ў Тракелі (Фота)
7 і 8 ліпеня мноства паломнікаў, святароў, сёстраў законных, гасцей і жыхароў Воранаўшчыны аб’яднала набажэнства ў гонар Маці Божай Тракельскай. Сёлета яно прайшло пад дэвізам “Пасланне Найсвяцейшай Панны Марыі з Фацімы — шлях да пакаяння” і было прысвечана 100-годдзю аб’яўлення Маці Божай Фацімскай.
Як штогод, на ўрачыстасць у санктуарый у Тракелях прыбылі вернікі не толькі з розных месц Беларусі, але і з-за мяжы. Кожны прыйшоў да Марыі з пашанай і верай, што яго надзеі і просьбы споўняцца. І ўзнёс да яе свае шчырыя малітвы на ружанцы ля алтара.
На пляцоўцы ля касцельных сцен, дзе размясціліся паломнікі, адбыліся марыйнае чуванне, канцэты духоўнай музыкі, гучалі словы падзякі, спадзяванняў, накіраваныя да Бога. Ноччу па вуліцах Тракеляў прайшла працэсія з запаленымі свечкамі і фігурнай выявай Маці Божай Фацімскай. Урачыстую службу правёў архіепіскап, мітрапаліт Мінска-Магілёўскі Тадэвуш Кандрусевіч. У ёй таксама прынялі ўдзел арцыбіскуп, мітрапаліт Збігнеў Станкевіч з Рыгі (Латвія), архімандрыт, прадстаўнік грэка-каталіцкай царквы Сяргей Гаек, біскупы і іншыя святары. Напрыканцы ўрачыстасці ў неба быў адпушчаны ружанец з шароў як сімвал малітваў усіх прысутных.
Марына КАНДРАТОВІЧ.
Фота Алега БЕЛЬСКАГА.
