Твораць для самых маленькiх
Ці лёгка быць дзіцячым пісьменнікам? Напэўна, не зусім… Трэба тонка разумець псіхалогію дзіцяці, старацца прадбачыць, што хвалюе самага юнага чытача. Да таго ж неабходна памятаць: маленькі чалавечак, які спасцігае ісціны свету, не можа дараваць ашуканства. Таму з упэўненасцю можна зазначыць: дзіцячымі пісьменнікамі нараджаюцца, а не становяцца. Адной з такіх творцаў і з’яўляецца Ганна Скаржынская-Савіцкая, якой нядаўна была прысуджана прэмія імя Аляксандра Дубко Гродзенскага абласнога выканаўчага камітэта “За творчыя дасягненні ў галіне культуры і мастацтва”.Ганна Іосіфаўна — член Саюза пісьменнікаў Беларусі. Нарадзілася на Шчучыншчыне ў мнагадзетнай сям’і. Скончыла Гродзенскі хіміка-тэхналагічны тэхнікум, працавала на Гродзенскім заводзе аўтаагрэгатаў. Друкавалася ў дзіцячых часопісах, у газетах “Гродзенская праўда”, “Перспектыва”, “Вячэрні Гродна”, “Дзянніца”. Яе казкі і апавяданні гучалі на беларускім рэспубліканскім радыё. Выдала кнігі для дзяцей “Вечарынка” (Гродна, 2008г.), “Расінка і Сонечны зайчык” (Гродна, 2010г.), “Приключения хомячка Тошки” (Гродна, 2010г.). Жыве і працуе ў г. Гродна.
У інтэрв’ю, якое пісьменніца дала “Гродзенскай праўдзе”, на пытанне, з якімі здабыткамі будзе сустракаць свята Дзень беларускага пісьменства, што адбудзецца ў верасні на Гродзеншчыне, Ганна Іосіфаўна зазначыла:
— Мне ўдвая прыемна, што свята адбудзецца ў Шчучыне, бо гэта мясціны, дзе я нарадзілася і вырасла. З задавальненнем буду прадстаўляць сваю кнігу “Кветка малой радзімы”, якая літаральна гэтымі днямі пабачыла свет. У аснове кнігі — тлумачэнне 50 беларускіх прыказак і прымавак. А некаторыя творы раздзела “На далонях Бацькаўшчыны” прысвечаны мясцінам Шчучынскага раёна, з якімі былі звязаны маё дзяцінства і школьныя гады.
Дарэчы, маленькія чытачы могуць пазнаёміцца з творчасцю Ганны Скаржынскай-Савіцкай у Воранаўскай раённай дзіцячай бібліятэцы. Там ёсць дзве кнігі пісьменніцы: “Надзейка-чарадзейка” і “Прыгоды хамячка Тошкі”.
Марына КАНДРАТОВІЧ.