Памятаем і ганарымся!

Прафесія настаўніка — адна з самых складаных. Яна патрабуе ад чалавека, які прысвяціў ёй жыццё, штодзённай творчасці, вялікай душэўнай дабрыні, любові да дзяцей, бездакорнага ведання сваёй справы. Усе гэтыя якасці адпавядаюць Генрыцы Францаўне Галадзенка, ветэрану педагагічнай працы, выдатніку народнай асветы, настаўніку матэматыкі МААУ САШ г. Несцерава імя В.І. Пацаева, якая адзначыла свой 80-гадовы юбілей 5 ліпеня.

У яе прамяністыя, уважлівыя вочы, адкрытая, шчырая ўсмешка, добра пастаўлены голас… З такім чалавекам хочацца пагаварыць, падзяліцца радасцю і бядой. Яна ўмее зацікавіць субяседніка, заўсёды гатова прыйсці на дапамогу і сказаць добрыя і шчырыя словы ўцехі. Мабыць, такімі якасцямі павінен валодаць сапраўдны настаўнік. Не па дыплому, а па прызванні!

Генрыка Францаўна нарадзілася 5 ліпеня 1944 года ў пасёлку Воранава. У 1962 годзе скончыла Воранаўскую сярэднюю школу. Любоў да педагогікі ў здольнай дзяўчынкі прачнулася рана, і 1962-1963 вучэбны год яна адпрацавала настаўніцай англійскай мовы і фізікі ў Таўзгінянскай васьмігадовай школе Воранаўскага раёна. У 1963 годзе паступіла ў Калінінградскі дзяржаўны педагагічны інстытут на матэматычны факультэт. Пасля яго заканчэння была напраўлена ў Несцераўскую сярэднюю школу Калінінградскай вобласці настаўнікам матэматыкі. У 1970 годзе па сямейных абставінах перайшла на працу ў Пакрышкінскую васьмігодку. У 1980 годзе працавала ў Вішнеўскай васьмігадовай школе Слаўскага раёна. У 1985 годзе Генрыка Францаўна вяртаецца ў Несцераў. Больш за 40 гадоў яна адпрацавала настаўніцай матэматыкі, шмат гадоў у розных школах была завучам па вучэбна-выхаваўчай рабоце.

Многія ведаюць і цэняць Генрыку Францаўну як таленавітага педагога, які выхаваў не адно пакаленне вучняў. На працягу многіх гадоў яна была настаўнікам для маладых спецыялістаў, якія пачыналі сваю прафесійную дзейнасць у Несцераве, рыхтавала прызёраў і пераможцаў конкурсаў і прадметных алімпіяд, мае вялікую колькасць падзяк і грамат. Заўсёды вельмі адказна адносілася да выхавання дзяцей. Была мудрым класным кіраўніком, старалася арганізаваць працу з дзецьмі так, каб яны самі праяўлялі ініцыятыву, імкнуліся палепшыць сваю паспяховасць і падрыхтаваць нумар мастацкай самадзейнасці на школьнае свята так, як хацелі. Вельмі цярпліва адносілася і да гарэзаў сваіх вучняў, праяўляючы мудрасць у адносінах да падлеткаў. Як вопытны педагог імкнулася разнастаіць віды работ на ўроку, дапамагала вучням авалодаць матэматычнай граматнасцю, стратэгіяй і тактыкай дыялагічных і групавых зносін, вучыла рашаць розныя камунікатыўныя задачы. За гады сваёй працы назапасіла багаты вопыт. Мудры, таленавіты педагог, настаўнік па прызванні, да глыбіні душы адказная да сваёй працы, яна знаходзіла ключык да сэрца кожнага вучня. Таксама яна цікавы чалавек, субяседнік, жонка, мама, бабуля. Яна заўсёды ўмее зразумець і дзіця, і дарослага, памагае справай і парадай. Яе асабістыя якасці — энергічнасць, справядлівасць, аптымізм — здабылі ёй аўтарытэт сярод вучняў і выкладчыкаў.

Два гады назад была падпісана дамова аб супрацоўніцтве паміж Воранаўскім раёнам і Калінінградскай вобласцю ў рамках міжнароднай праграмы “Расія-Беларусь: моцнае партнёрства”. Праграмай прадугледжана супрацоўніцтва паміж установамі адукацыі Воранаўскага раёна і адукацыйнымі арганізацыямі Калінінградскай вобласці. Цікавыя факты былі адкрыты ў рамках супрацоўніцтва Пагародзенскай сярэдняй школы з Несцераўскай сярэдняй агульнаадукацыйнай школай імя В.І.Пацаева. У рамках праекта “Імі ганарыцца школа” было ўстаноўлена, што там працавала настаўніцай ураджэнка Воранаўскага раёна Генрыка Францаўна Галадзенка. У Несцераве яе цэняць і паважаюць як мудрага і таленавітага педагога, цікавага чалавека. І мы ганарымся, што такі педагог — наша зямлячка!

Ганна ШчыглА,

настаўнік беларускай мовы і літаратуры Пагародзенскай

сярэдняй школы.

Фота з сеткі інтэрнэт.