Прыпеўкі з кожнага двара гучалі ў Канвелішках
Кола брэндавых мерапрыемстваў, што прайшлі ў аграгарадках Воранаўшчыны, сёння завяршылася ў Канвелішках. Работнікі культуры на імправізаваных падворках цікава і творча прадставілі свае святы.
Гаспадароў канвелішскай зямлі віталі начальнік аддзела ідэалагічнай работы, культуры і па справах моладзі райвыканкама Таццяна Цехановіч і старшыня мясцовага сельсавета Ірына Пільжыс. Пажадалі ўсім дабрабыту, любові і згоды ў сем’ях і, нягледзячы на халоднае надвор’е, цудоўнага адпачынку.
Жыхары Канвелішак — Ганна Русак, Ірэна Кічко, Браніслаў Чапля, Рэгіна Станкевіч і Вольга Казіміраўна Сінкевіч — выклікалі на “музычны паядынак” прадстаўнікоў культуры раёна. Як аказалася, у багажу абедзвюх каманд мноства цікавых прыпевак: пра каханне, людзей і нават пра канвелішскую ваколіцу. Удалыя гарманісты Іван Вараноўскі і Іван Бянкевіч падтрымалі выканаўцаў. Перамогу жа святкавала таленавітая каманда аграгарадка.
Гледачы змаглі атрымаць асалоду і ад песень, якія выконвалі калектывы “Лявоны”, “Весялуха” з Пераганцаў, а таксама артысты раёна і госці з Іўеўшчыны.
