Народны ансамбль народнай музыкі і песні “Лявоны” адзначыў 35-годдзе
На юбілейнай імпрэзе гледачы сустракалі яго і развітваліся з ім стоячы. Не шкада эмоцый і авацый калектыву, які заварожвае сваім віртуозным і пранікнёным выкананнем!
Ансамбль, па-сутнасці, утварыўся спантанна ў 1982 годзе: педагогі-мужчыны Воранаўскай дзіцячай школы мастацтваў вырашылі зрабіць сюрпрыз сваім калегам-жанчынам на 8 сакавіка. На сцэну раённага Дома культуры яны выйшлі і выступілі калектывам. І мелі вялікі поспех. Адсюль пачалося творчае жыццё ансамбля, якім з першых дзён кіраваў энергічны і таленавіты Вячаслаў Мацкевіч. “Лявоны” хутка набіралі папулярнасць. Яны спявалі на сцэнічных пляцоўках 9-ці краін Еўропы, Азіі, Амерыкі. Усюды гледача зачароўвала яго самабытнасць, шчырае і выразнае выкананне, гарманічнае гучанне народных інструментаў. Гармонік, тамбурын, жалейка, скрыпка, барабан, кантрабас тварылі цуды ва ўмелых руках таленавітых музыкантаў. Кожны інструмент надаваў музыкальнай кампазіцыі сваю прыгажосць і глыбіню. А сакавітыя галасы салістаў! Хіба ж такія часта пачуеш?..
Падчас юбілейнага канцэрта на сцэну Воранаўскага гарадскога цэнтра культуры і вольнага часу да дзеючага саставу калектыву, дзе засталіся саліст Аляксандр Кукін і цяперашні кіраўнік Аляксандр Мацюк, падняўся амаль поўны першапачатковы. Вячаслаў Мацкевіч і Мікалай Шманок (гармонік), Іван Пяцюль (жалейка), Валерый Рыхлевіч (дудка-бас), Уладзіслаў Рыхлевіч (барабан), Вацлаў Сцефановіч (кантрабас), Аляксандр Пашкевіч (скрыпічны кантрабас). Кожны з іх унёс свой уклад у гісторыю і поспех калектыву. Па статусу яны яго ветэраны, але ні па натуры. Яны ўсё тыя ж віртуозныя, непаўторныя, таленавітыя “лявоны”. Падчас выступлення пераемнікаў ім не сядзелася на месцах пачэсных гледачоў. Прытопвалі рытм нагамі, падпявалі і не скупіліся на апладысменты для сённяшніх “Лявонаў”.
Дарэчы, напачатку ў складзе ансамбля былі жанчыны. Выкладчыца музыкальнай школы Ала Лаўрушчык некаторы час іграла на скрыпцы, пасля — яе вучаніца Ірына Папова (Жыткевіч). Іх надоўга змяніў Эдуард Лі.
Разам з гасцямі-аматарамі юбіляры гарталі старонкі свайго творчага жыцця, радавалі любімымі песнямі. Гучалі іх брэндавыя “Прывітальная”, “Тры дубы”, “Туман ярам”, “Адам і Марыля”, “Воранаўскі край”. Усе, хто прыйшоў на творчы вечар каларытных музыкантаў, прыемна правялі свой час. І ўпэўніўся, “Лявоны” ўсё такія ж яркія, таленавітыя і шчырыя. І няхай трымаюць марку і надалей!
Вольга ВАРАБ’ЁВА.
Фота Алега БЕЛЬСКАГА.
