Плённай працы ўраджаем Пагародна сустракала (Фота)
Ужо пяты год запар ладзіцца для вяскоўцаў “Пагародзенскі кірмаш”, які стаў брэндам аграгарадка. У нядзелю тэрыторыя мясцовага цэнтра культуры і вольнага часу ператварылася ў вялікую канцэртна-забаўляльную пляцоўку, дзе працаваў гандаль, гучала музыка, весяліліся дзеці. Асаблівы каларыт месцу дзейства надавала мноства цёплых вераснёўскіх фарбаў: жоўта-карычневая квецень сціплых аксамітак, аранжавая спеласць кавуноў, наліўная прыгажосць яблыкаў, выразная чырвань гроздак каліны, шыпшыны і рабіны. З агародніны, фруктаў, ягад, грыбоў умелымі рукамі работнікаў культуры былі створаны сапраўдныя шэдэўры — букеты, кампазіцыі, казачныя героі, прыгатаваны апетытныя стравы. Усё гэта было ўпрыгожваннем свята, прыкметай шчодрай ураджайнай восені. На кірмашы можна было пакаштаваць духмянай юшкі і шашлыка, купіць бульбу, зерне новага ўраджаю. Толькі і паспявалі смажыць мясныя кавалачкі на мангале ды наліваць наварыстую юшку працаўнікі КСУП э/б “Пагародна”! Прысмакі прыйшліся гасцям даспадобы: разышлося больш за дваццаць кілаграмаў мяса і амаль 80 літраў рыбнага супчыку. Аб галоўных святочных стравах паклапацілася кіраўніцтва мясцовага сельгаспрадпрыемства, а творчае аздабленне восеньскага кірмашу рыхтаваў калектыў Пагародзенскага цэнтра культуры. Яно было не толькі музычным. У масах “працавалі” мясцовыя знахаркі Януся і Гануся, каб не даць людзям засумаваць. У ход ішлі і дасціпныя жарты , і “лекавыя” пачастункі. Для гасцей свята спявалі работнікі культуры з усяго раёна: вакальныя гурты “Весялуха” з Тракеляў, “Крынічка” з Доцішкаў, “Пралеска” з Начы, “Поющие сердца” з Пераганцаў, а таксама пагародзенскія выканаўцы. З канцэртнай праграмай заглянулі на кірмаш і суседзі — народны ансамбль народнай песні са Шчучыншчыны “Сябрына”, калектыў Астрынскага цэнтра культуры.
У гэты дзень дыплом удзельніка рэгіянальнага фестывалю традыцыйнай культуры “Скарбы Гродзеншчыны ” атрымала народны майстар Станіслава Міхна. Яго ўручыла жанчыне Таццяна Цехановіч, начальнік аддзела ідэалагічнай работы, культуры і па справах моладзі райвыканкама . Прывіталі ўдзельнікаў мерапрыемства і старшыня сельвыканкама Вольга Сінельнікава, намеснік старшыні па ідэалагічнай рабоце эксперыментальнай базы “Пагародна” Рэната Лазоўская. У святочны дзень на сваю малую радзіму завітала і Надзея Маркевіч, вядучая перадачы “Надзея на сяло” на Гродзенскім тэлебачанні. Землякі былі рады сустрэчы з ёю. Несумненна, з кірмашу атрымаецца цікавы рэпартаж, які ў хуткім часе стане сюжэтам праграмы на канале “Беларусь 4”. Музычны падарунак са сталіцы прывёз спявак беларускай эстрады Сяргей Славянскі. Усе, хто знайшоў час наведаць “Пагародзенскі кірмаш”, адпачылі і атрымалі сапраўдную асалоду і зарад добрага настрою на наступны працоўны тыдзень.
Вольга ВАРАБ’ЁВА.
Фота Алега БЕЛЬСКАГА.
