Дзень трэці Тыдня культуры. Майстры зямлі воранаўскай
Наколькі таленавітыя нашы землякі, можна было ўбачыць 16 жніўня на выставе работ умельцаў Воранаўшчыны ў гарадскім цэнтры культуры і вольнага часу.
Мерапрыемства адкрылі старшыня райвыканкама Мікалай Розум і старшыня раённага аб’яднання прафсаюзаў і раённай арганізацыі ГА "Беларускі саюз жанчын" Алена Ястрэмская. Яны зазначылі, што гэтая выстава дае магчымасць мясцовым умельцам прадэманстраваць вынікі сваёй творчай працы. Цудоўна, што ўсе мы можам пераканацца ў тым, наколькі багатыя працоўныя калектывы на яркіх, таленавітых і здольных людзей.
У гэты дзень свае лепшыя вырабы выставілі прадстаўнікі пярвічных арганізацый прафсаюзаў і грамадскага аб’яднання “Беларускі саюз жанчын” раёна са сфераў адукацыі, медыцыны, культуры, а таксама з райвыканкама, РУП ЖКГ, ТЦСАН, Воранаўскага філіяла аблспажыўтаварыства і сельскай гаспадаркі — “Эліт-Агра Больцінікі”, э/б “Кастрычнік” і “Доцішкі”. У кожнага свой матэрыял, свая тэхніка і свой стыль. Цікавымі былі работы з паперы, скуры, тканіны, дрэва, карціны, вышытыя крыжыкам, з саломы, і інш. Модніцы спыняліся каля арыгінальных завушніц, калье, вязаных кручком і прутком сукенак, матулі — каля рознакаляровых бантоў і заколак.
На выставу прыйшлі і некаторыя майстрыцы. Пагутарыць удалося з галоўным спецыялістам аддзела ЗАГС райвыканкама Людмілай Мецюнас і медсястрой Воранаўскай ЦРБ Святланай Буклярэвіч. Людміла Іванаўна творыць ужо пяць год. Асабліва па душы — пляценне з паперы. На гэтым не спыняецца — любіць эксперыментаваць. Засвоіла тэхніку канзашы — майструе незвычайныя ўпрыгожванні з тканіны ў выглядзе кветак, працуе са скурай. Колькі ў яе вырабаў, цяжка падлічыць. Зробленае сваімі рукамі любіць дарыць родным і сябрам. Святлана Рамуальдаўна са школы “сябруе” з прутком і кручком. Яна стала мадэльерам як для сябе, так і для дачушкі з мамай. Акрамя таго, хобі Святланы — лялькі. І не проста звязаныя: рукі, галава і ногі рухаюцца.
Умельцаў, работы якіх былі прадстаўлены ў Цэнтры, вельмі многа. Іх імёны: знаёмыя і незнаёмыя. Цудоўна, што людзі маюць справу, за якой адпачываюць душою.
Марына КАНДРАТОВІЧ.
Фота Алега БЕЛЬСКАГА.
