Сёння ў Воранаве прайшоў I абласны фэст народнага танца (Фота)
Перастук абцасаў, заліхвацкія “э-эх!”, поўная зала гледачоў — жыва, ярка, каларытна ў Воранаве прайшоў I абласны фэст народнага танца.
Сёння Воранаўшчына гасцінна прымала ўдзельнікаў I абласнога фэсту народнага танца. Гледачоў і юных танцораў прывіталі і выказалі надзею на адкрыццё новых талентаў старшыня Воранаўскага раённага Савета дэпутатаў А.Я. Ганевіч і начальнік аддзела выхаваўчай і сацыяльнай работы галоўнага ўпраўлення адукацыі Гродзенскага аблвыканкама Т.В. Асмалоўская.
Ідэйным натхняльнікам свята танца з’яўляецца кіраўнік ансамбля “Радунскія салавейкі” Францішка Францаўна Габіс. Менавіта калектыў пад яе кіраўніцтвам і адкрыў фестывальны дзень. Танцавальнай пляцоўкай для 27 гуртоў з розных рэгіёнаў Гродзеншчыны стала сцэна Воранаўскага гарадскога цэнтра культуры і народнай творчасці. Гучнымі апладысментамі сустракалі артыстаў з Гродна, Воранаўскага, Карэлічскага, Смаргонскага, Слонімскага, Мастоўскага, Навагрудскага, Ваўкавыскага, Лідскага раёнаў.
На першы погляд лёгкія рухі танцораў, безумоўна, патрабуюць сур'ёзнай фізічнай падрыхтоўкі, штодзеннай працы і вялікага артыстызму. Конкурс арыентаваны на лакальную культуру і яе праявы ў пластыцы, кампазіцыі, эстэтыцы, а яшчэ ў строях. Сапраўднае задавальненне атрымліваеш ад назірання за сцэнічнай модай: якія прыгожыя і непаўторныя беларускія вышыванкі ўпрыгожваюць касцюмы ўдзельнікаў.
Добра вытрымалі танцавальны рытм і паўторна выйшлі на паклон пры ўзнагароджанні ўсе ўдзельнікі фестывалю. Але конкурс патрабуе вызначэння пераможцаў. З гонарам магу зазначыць, што калектывы Воранаўшчыны ўзялі не толькі прызавыя месцы. Танцавальны гурт Пялясскай сярэдняй школы з навучаннем на літоўскай мове з кампазіцыяй “Ткачыхі” стаў пераможцам у старэйшай узроставай групе. Першае месца таксама занялі ансамбль танца “Задорынка” і ўзорны ансамбль танца “Вярбіначка” з Гродна. Віншуем пераможцаў!
Першы абласны фэст народнага танца стане традыцыйным для нашага раёна і будзе праводіцца праз год. Да новых сустрэч!
Падрабязней чытайце на старонках “ВГ”.
Галіна ШЛЕМПА.
Фота Алега БЕЛЬСКАГА.
