Ідэалагічна-культурная супольнасць Воранаўшчыны падвяла вынікі работы за 2017 год (Фота)
У паседжанні савета аддзела ідэалагічнай работы, культуры і па справах моладзі райвыканкама прынялі ўдзел Аляксандр Вярсоцкі — начальнік галоўнага ўпраўлення ідэалагічнай работы, культуры і па справах моладзі аблвыканкама, Мікалай Розум — кіраўнік раёна, Віктар Роік — старшыня райсавета дэпутатаў, Андрэй Карповіч — намеснік старшыні Воранаўскага райвыканкама. Былі запрошаны таксама і старшыні грамадскіх аб’яднанняў Воранаўшчыны.
Было адзначана, што 2017 год быў насычаным цікавымі святамі, фестывалямі, конкурсамі, выставамі. Усё гэта ладзілася творчымі калектывамі ўстаноў культуры ў гонар сваіх землякоў і для іх жа. Важнай падзеяй для Воранаўшчыны стаў адкрыты раённы фестываль народных традыцый і мастацтва “Песні Воранаўшчыны маёй”, менавіта мінулы год стаў юбілейным для Радуні — гарадскі пасёлак адзначыў сваё 630-годдзе. У кожным аграгарадку адбыліся брэндавыя мерапрыемствы, якія стануць для вяскоўцаў традыцыйнымі. Упершыню і на высокім узроўні прайшлі святы бліноў, дзіцячай творчасці, беларускага ручніка, рыбака, прыпеўкі і г.д.
Работа ідэалагічнай вертыкалі раёна ў 2017-м планавалася і праводзілася з улікам асноўных агульнадзяржаўных мерапрыемстваў: выбараў дэпутатаў у мясцовыя Саветы дэпутатаў 28-га склікання, Года навукі. Яна была накіравана на падтрыманне стабільнай грамадска-палітычнай і сацыяльна-эканамічнай абстаноўкі ў раёне, павышэнне сацыяльнай актыўнасці грамадзян, задавальненне яго патрэб, інфармаванне жыхароў раёна аб асноўных напрамках дзяржаўнай палітыкі і дзейнасці мясцовых органаў ўлады.
У цэлым вынікі работы ідэалагічнай вертыкалі Воранаўшыны, сферы культуры, сродкаў масавай інфармацыі станоўча ацаніў Аляксандр Вярсоцкі. Ён падзякаваў кіраўнікам і працоўным калектывам за намаганні, якія яны прыклалі для таго, каб выбарчая кампанія ў раёне на ўсіх этапах прайшла на вельмі высокім узроўні, каб творчыя мерапрыемствы праводзіліся ярка і запамінальна, каб узнагароды ў прэстыжных прафесійных конкурсах папоўнілі скарбонку Гродзеншчыны.
Падчас мерапрыемства ганаровыя граматы, падзячныя пісьмы і іншыя ўзнагароды атрымалі многія працаўнікі сферы.
Вольга ВАРАБ’ЁВА.
Фота Алега БЕЛЬСКАГА.
