Да Дня беларускага пісьменства застаўся 1 месяц. Што рыхтуюць арганізатары?
Месяц застаўся да Дня беларускага пісьменства – галоўнага свята беларускага слова, кнігі, аўтараў і чытачоў. Сёлета яно пройдзе ў 26 раз. Удзельнікаў і гасцей будуць вітаць на гасціннай слонімскай зямлі, у горадзе над Шчарай. Сустрэчы з кнігамі і аўтарамі, аўтограф-сесіі, гульні, беларускія песні і родная мова… Праграма абяцае быць цікавай і насычанай. Што рыхтуюць у сталіцы Дня беларускага пісьменства да свята?
Запрашаем!
Рыхтуючыся да сустрэчы, Слонім і яго жыхары стараюцца ўпрыгожыць свой утульны і прывабны горад.
На ўездзе з боку Мінска, Ліды і Ваўкавыска, а таксама ў розных кропках горада і ў Жыровічах усталяваны шэсць прыгожых банераў з выявамі гістарычных будынкаў, асноўных турыстычных аб’ектаў, з беларускімі матывамі і сімваламі, а таксама словамі-прызнаннямі кшталту “Родная мова – гонар і годнасць народа”. Святочныя інфармацыйныя банеры хутка з’явяцца ва ўсіх аграгарадках Слонімскага раёна, а таксама ў райцэнтры.
Будуць упрыгожаны апоры асвятлення на мосце праз Шчару, што ў напрамку сталіцы. На іх размесцяць невялікія банеры – як напамін, што 1 верасня ў Слоніме пройдзе Дзень беларускага пісьменства.
Для зручнасці гасцей з іншых гарадоў і краін у цэнтры горада з’явіліся інфармацыйныя стэнды для турыстаў з картай горада і апісаннем асноўных аб’ектаў, якія варта наведаць, указаннем адлегласці да іх. Такія падказкі застануцца і пасля свята.
Працягваецца праца па аздабленні фасадаў. Рамонтныя работы праведзены і завяршаюцца на многіх будынках. Таксама на фасадзе аднаго з дамоў па вуліцы Чырвонаармейскай ужо з’явілася графіці з выявай гістарычнага будынка тэатра Агінскага. Яшчэ на адным неўзабаве можна будзе пабачыць пазнавальны сюжэт: Скарына працуе над кнігамі. На шматпавярховых дамах дзень за днём можна назіраць новыя малюнкі з беларускім арнаментам.
Адкрыцці свята
Адна з нязменных традыцый Дня беларускага пісьменства – адкрыццё помнікаў і скульптур у сталіцы свята. Да прыкладу, у Навагрудку ўвекавечылі памяць Елісея Лаўрышаўскага, у Смаргоні – Францішка Багушэвіча. Такой знакавай постацю ў Слоніме стаў Леў Сапега. Неўзабаве тут з’явіцца помнік гэтаму дзяржаўнаму і ваеннаму дзеячу, аднаму з аўтараў Статута ВКЛ, які ў 1586 годзе атрымаў ва ўпраўленне Слонім. Аўтары скульптуры – ураджэнец Слонімшчыны Іван Міско, а таксама Уладзімір Піпін і Сяргей Логвін.
У Дзень пісьменства ў горадзе над Шчарай урачыста адкрыецца яшчэ адна кнігарня пад назвай “Санет”. Новы адрас для ўсіх, хто любіць чытаць, – Чырвонаармейская, 40, уваход з тарца. А не так даўно сланімчан запрасілі ў новы павільён “Белсаюздрук”, дарэчы, другі такі ў вобласці. Галоўная асаблівасць – яго шматфункцыянальнасць. Тут можна набыць часопісы, газеты, кнігі, выпіць кубачак кавы ці набыць марозіва, аформіць падпіску, зарадзіць тэлефон… Адным словам, сучасны аб’ект гандлю, выдатны падарунак з нагоды свята.
Сувенір для напаміну
Канешне, галоўным брэндам Дня беларускага пісьменства стануць кнігі: іх будзе прадстаўлена вялікае мноства, таму кожны чытач абавязкова знойдзе сваю.
Багата сувеніраў прапануюць майстры Гродзеншчыны. Таксама спецыяльна да свята была распрацавана сувенірная прадукцыя: карціны і пано з сімволікай Дня пісьменства, вышытыя карціны з беларускім арнаментам, магніцікі, нататнікі ды закладкі з цытатамі беларускіх пісьменнікаў. Яны ўжо ёсць у гандлёвай сетцы. А да свята асартымент пашырыцца.
15 адрасоў, каб завітаць
Кніжная, кветкавая, фальклорная, мастацкая, тэатральная, дзіцячая, спартыўная, мала-дзёжная і іншыя пляцоўкі адкрыюцца падчас Дня пісьменства. Размесцяцца яны ў цэнтры горада – па вуліцах Чырвонаармейскай, Савецкай, Опернай, В. Крайняга і, канешне, на плошчы Леніна.
На кожнай абыграюць дэвіз Дня пісьменства ў Слоніме: “ЛІТАРАльна наша свята”.
Адметна, што першыя пляцоўкі пачнуць працу напярэдадні свята – 31 жніўня. І, увага, часткова размесцяцца ў Жыровічах. Тут пройдзе традыцыйны для свята міжнародны круглы стол, за якім сустрэнуцца аўтары і перакладчыкі з розных краін, каб пагутарыць на тэму яднання розных культур і народаў праз кнігі і літаратуру. Таксама адбудзецца навукова-практычная канферэнцыя “Слонімскія чытанні”. У Жыровічы завітае і рэспубліканская навукова-практычная экспедыцыя “Дарога да святыняў” з Благадатным агнём ад Гроба Гасподняга, яе ўдзельнікі сустрэнуцца з жыхарамі аграгарадка.
Таксама напярэдадні свята ў Жыровічах пройдзе творчы конкурс юных чытальнікаў “Жывая класіка”.
31 жніўня ў Слоніме пройдуць Коласаўскія чытанні, прысвечаныя 75-годдзю стварэння Слонімскай раённай бібліятэкі імя Я.Коласа, адбудуцца сустрэчы пісьменнікаў з творчай інтэлігенцыяй і моладдзю.
Галоўная сцэна (вул. Чырвонаармейская, 25)
- урачыстае адкрыццё Дня беларускага пісьменства,
- уручэнне Нацыянальнай літаратурнай прэміі,
- закрыццё Дня беларускага пісьменства,
- канцэрт майстроў мастацтваў “Льецца песня па-над Шчарай”
* Падчас свята вырашыцца інтрыга, хто ў гэтым годзе атрымае Нацыянальную літаратурную прэмію. У спісе намінантаў – сем дзясяткаў аўтараў, кнігі якіх выйшлі ў мінулым годзе. Прэміі ўручаць у сямі намінацыях, вызначыўшы лепшыя твор ці зборнік паэзіі, твор прозы, драматургіі, публіцыстыкі, літаратурнай крытыкі і літаратуразнаўства. Таксама назавуць выданні і аўтараў, якія сталі пераможцамі ў намінацыях “Лепшы дэбют” і “Лепшы твор для дзяцей і юнацтва”.
Спартыўная пляцоўка (вул. Някрасава, вул. Оперная)
- адкрытае першынство Слоніма па веславанні на байдарках і каноэ,
- адкрытыя турніры па гандболе, шашках і шахматах, валейболе, міні-футболе,
- адкрытае першынство “Дзіцячая лёгкая атлетыка”.
Пляцоўка “Дыялог літаратур – дыялог культур” (вул. Першамайская)
- выстава кніг з іншых краін, як у перакладзе, так і ў арыгінале.
Пляцоўка “Дакрануцца да духоўнасці” (вул. В. Крайняга)
- выстава-продаж кніг, царкоўных рэчаў, мёду, манастырскай гарбаты і выпечкі,
- мастар-клас па травяным зборам,
- выстава рэдкай кнігі, царкоўнага адзення.
Пляцоўка “Вясёлка дзяцінства” (вул. Оперная)
- канцэрт лепшых дзіцячых калектываў Слонімскага раёна,
- сюжэтна-гульнёвыя і анімацыйныя праграмы,
- прэзентацыя дзіцячых бібліятэк Гродзенскай вобласці “Жамчужына дзіцячай літаратуры”,
- алея кніг-юбіляраў і тэатралізаваныя прадстаўленні па кнігах.
Турыстычная пляцоўка “Гродзеншчына запрашае” (вул. Чырвонаармейская)
- макеты самых значных турыстычных аб’ектаў вобласці з QR-кодамі,
- работа інтэрактыўных міні-пляцовак.
Выставачная пляцоўка (плошча Леніна)
- адкрыццё помніка Льву Сапеге,
- мастацкая выстаўка-продаж твораў мастакоў Гродзенскай абласной арганізацыі Беларускага саюза мастакоў,
- выстава работ мастакоў Слонімшчыны “Арт-Слонім”,
- выстава работ вучняў дзіцячых школ мастацтваў Слонімскага раёна.
Пляцоўка “Фальклорная” (плошча Леніна)
- абласны конкурс ансамбляў беларускай музыкі і песні, ансамбляў народнай песні “І родная мова як песня гучыць”,
- выстаўка-продаж тэматычнай сувенірнай прадукцыі майстроў Гродзенскай вобласці.
Пляцоўка прафесійна-тэхнічных устаноў адукацыі (вул.Савецкая)
- выстава вырабаў навучэнцаў сярэдніх спецыяльных, прафесійна-тэхнічных устаноў адукацыі Гродзенскай вобласці.
Пляцоўка кнігі і прэсы (вул. Чырвонаармейская, 40)
- павільёны “Кнігі і прэса Рэспублікі Беларусь”, “Слова пісьменніка”, “Добрая кніга – дзецям”,
- кнігі-пераможцы нацыянальнага і міжнароднага конкурсаў,
- кнігі, прысвечаныя 75-годдзю вызвалення Беларусі ад нямецка-фашысцкіх захопнікаў,
- кнігі пісьменнікаў-юбіляраў,
- кнігі, прысвечаныя Году малой радзімы,
- прэзентацыя альбомаў Гродзенскай вобласці,
- грамадска-культурная акцыя “Чытаем Купалу разам”,
- выстаўка “СМІ Гродзеншчыны”,
- выстаўка самаробнай кнігі,
- паштовы падворак “Ад старажытных часоў да сучаснасці”,
- святочны гандаль кнігай.
Тэатральная пляцоўка “Чароўнае свята тэатра” (плошча Леніна, унутраны дворык драмтэатра, 31 жніўня – 1 верасня)
31 жніўня:
- фінал рэспубліканскага творчага конкурсу юных чытальнікаў “Жывая класіка”,
- падвядзенне вынікаў рэспубліканскай акцыі “Лета з добрай кнігай”.
1 верасня:
- спектаклі Слонімскага тэатра “Як павука з луга праганялі” і “Камедыя”,
- спектаклі тэатраў батлейкі Гродзенскай вобласці,
- канцэрт класічнай музыкі.
Пляцоўка “Запрашаем на падворкі” (вул.Чырвонаармейская)
- свята-фэст беларускай кухні і беларускай прадукцыі,
- кірмаш прадпрыемстваў Гродзенскай вобласці,
- выступленні фальклорных калектываў.
Пляцоўка “Кветкавы карагод” (вул. Чырвонаармейская, 23)
- выстава кампазіцый з кветак,
- майстар-клас па складанні букетаў,
- літаратурная віктарына “Квяцісты вянок”.
Пляцоўка “Хараство ўмелых рук” (плошча Леніна)
- майстар-класы традыцыйных рамёстваў Гродзенскай вобласці па народным ткацтве, ганчарству, кавальству, пляценні з прыродных матэрыялаў, лозапляценні, традыцыйнай выцінанцы і сучасных тэхніках мастацкай работы з паперы,
- выстава нумізматаў краіны.
