Фэст у гонар Святога Лінаса адбыўся на Воранаўшчыне (Фота, будзе дапоўнена)
Сёлета парафіяльнае свята прыпала на нядзелю, 23 верасня. Ужо каторы год яно збірае вяскоўцаў і дыпламатычных літоўскіх гасцей у Пелясе. Далучыліся да значнай для нашых землякоў падзеі пасол Літоўскай Рэспублікі Андрюс Пулокас, генеральны консул Літоўскай Рэспублікі ў Гродна Генадзіус Мацкяліс, намеснік старшыні Воранаўскага райвыканкама Андрэй Карповіч, старшыня Больцішскага сельсавета Аксана Палубенка, прадстаўнікі грамадскага аб’яднання літоўцаў “Гярвечай”.
Святочную імшу правёў ксёндз Эліяс Маркаўскас, для якога сустрэча з жыхарамі пялясскага краю таксама была радаснай падзеяй. Святар раней вёў багаслужэнні тут, але ўжо год з’яўляецца настаяцелем касцёла ў Гервятах. Падчас імшы да заступніка і пакутніка Лінаса, імя якога носіць мясцовы касцёл, звярнуліся ў агульнай малітве дыпламатычныя госці, прадстаўнікі раённай улады, прыхажане.
Свята прадоўжылася ў Пялясскай школе з навучаннем на літоўскай мове. Штогод сваімі сіламі настаўнікі і вучні рыхтуюць канцэртную праграму. Сёння яна таксама была двухмоўнай і вельмі разнастайнай. Гучалі і літоўскія песні, і беларускія. Гледачы горача падтрымлівалі выступоўцаў — жаночы вакальны ансамбль школы, дзіцячую капэлу, самадзейныя вакальныя гурты.
Пасля канцэртнай праграмы гасцей фэсту чакаў святочны абед з традыцыйнымі літоўскімі стравамі.
Вольга ВАРАБ’ЁВА.
Фота аўтара.
